Azərbaycanın uşu-sanda komandası Türkiyənin Bolu şəhərində təşkil olunan doqquzuncu Açıq Balkan Çempionatı və Avrasiya Kubokunda 19 medal qazanıb.
Yarışda 21 ölkənin idmançıları mübarizə aparıblar. 19 idmançı və dörd məşqçidən ibarət Azərbaycan komandası sanda və light sanda növlərində çıxış edib.
Azərbaycan təmsilçiləri doqquz qızıl, doqquz gümüş və bir bürünc medal əldə ediblər. Beləliklə, komanda turniri ümumilikdə 19 medalla başa vurub.
Komanda yarışlarında iştirak edən gənclərdən ibarət Azərbaycan yığması Türkiyə komandasından sonra ümumi hesabda ikinci yeri tutub. Komanda yarışda gənclərdən ibarət yığmanın baş məşqçisi Elçin Eminovun rəhbərliyi ilə çıxış edib.