Afət Ziyadqızı
Bu gün Səudiyyə Ərəbistanının poytaxtı Ər-Riyad şəhərində Türkiyə, Pakistan və Səudiyyə Ərəbistanı arasında imzalanmış Məkkə Birgə Müdafiə Sazişi çərçivəsində Strateji Siyasi və Müdafiə Komitəsinin növbəti yüksək səviyyəli toplantısı keçirilir.
"Operativ Məlumat Mərkəzi-OMM" xəbər verir ki, Türkiyə Xarici İşlər Nazirliyindəki mənbələrin verdiyi məlumata görə, iclasda Türkiyənin xarici işlər naziri Hakan Fidan, müdafiə naziri Yaşar Gülər və Baş Qərargah rəisi, ordu generalı Selçuk Bayraktaroğlu iştirak edirlər.
Toplantıda Hakan Fidanın hərbi-siyasi ittifaqın institusionallaşdırılması prosesi, katibliyin Ər-Riyadda fəaliyyətə başlaması və növbəti strateji addımlarla bağlı Ankaranın rəsmi mövqeyini təqdim edəcəyi gözlənilir. Türkiyəli diplomat husilərin Səudiyyə Ərəbistanına və müqəddəs məkanlara təxribatçı hücumlarını pisləyərək Ankaranın Ər-Riyadla güclü həmrəyliyini bir daha bəyan edəcək. Eyni zamanda, beynəlxalq dəniz ticarəti marşrutlarında təhlükəsizliyin təmin olunması və İsrailin regionda sabitliyi pozan fəaliyyətlərinə qarşı birgə mövqenin nümayiş etdirilməsi planlaşdırılır.
Xatırladaq ki, Məkkə Birgə Müdafiə Sazişi 2026-cı il avqustun 7-də Türkiyə Prezidenti Rəcəb Tayyib Ərdoğan, Pakistanın Baş naziri Məhəmməd Şahbaz Şərif və Səudiyyə Ərəbistanının vəliəhdi Məhəmməd bin Salman tərəfindən imzalanıb. Region ölkələrinin birgə çəkindirmə və müdafiə imkanlarını gücləndirməyi hədəfləyən alyansın ilk təsis toplantısı avqustun 31-də İstanbulda keçirilib, ardınca sentyabr ayında Nyu-York və Ər-Riyadda nazirlər və baş qərargah rəisləri səviyyəsində işçi görüşlər təşkil olunub. Alyansın ilk baş katibi vəzifəsinə Pakistandan olan istefada olan general-leytenant Nauman Mahmudun namizədliyi irəli sürülüb.
