Rusiya prezidenti Vladimir Putin Krım körpüsünə Ukrayna tərəfindən endirilən zərbələrə cavab veriləcəyini vəd edib. O, enerji və dəniz infrastrukturlarına hücumların dayandırılması barədə mümkün razılaşma üzrə danışıqları istisna edib. AnewZ-in məlumatına görə, Putin bu açıqlamanı Çin və ABŞ liderləri ilə danışıqlardan sonra, cümə axşamı Çinin Şençjen şəhərində keçirilən mətbuat konfransında verib.
Putin Rusiyanın cavabının “Kiyev rejiminin körpüyə etdiyindən qat-qat ağrılı” olacağını deyib. “Krım körpüsünə zərbələrdən sonra danışıqlar aparmayacağıq. Bu zərbələrə cavab verəcəyik və bunu hər kəsin bilməsini istəyirəm”, – deyə o bildirib.
Putin danışıqları istisna edib
Görünüşcə qəzəbli olan Putin daha əvvəl Rusiyanın Təhlükəsizlik Şurasının üzvlərinə dəniz və enerji infrastrukturuna hücumların dayandırılması barədə mümkün razılaşmanı nəzərdən keçirməyi tapşırdığını söyləyib. Onun sözlərinə görə, körpüyə zərbələr bu variantı gündəmdən çıxarıb.
Putin Ukraynanın körpüdən hərbi məqsədlərlə istifadə edildiyi barədə arqumentini rədd edib. O, körpüdən hərbi texnika və sursat daşınmaması barədə şəxsən göstəriş verdiyini, həmçinin oradan neft və neft məhsullarının daşınmadığını iddia edib. “Bu, müstəsna olaraq mülki obyektdir”, – deyə Putin bildirib. Rusiyanın cavabının necə olacağı barədə suala isə “Qisas olacaq” cavabını verib.
Alternativ quru marşrutu gücləndiriləcək
Putin zədələnmiş körpünün bərpa ediləcəyini, avtomobil yolu hissəsinin ciddi zərər gördüyünü deyib. Onun fikrincə, dəmir yolu hissəsi artıq bərpa olunub. Müasir dəqiq tuşlanan silahlarla belə hücumların həyata keçirilməsinin “xüsusilə çətin olmadığını” da qeyd edib.
Putin bildirib ki, Kiyevin körpünü dağıtmaqla bağlı təkrar hədələrinə görə Moskva Krımın Rusiya ilə alternativ quru əlaqəsinə ehtiyac olduğunu uzun müddətdir vurğulayırdı. Onun sözlərinə görə, bu əlaqə artıq Zaporojye və Xerson vilayətləri vasitəsilə qurulub. Hücumdan sonra Rusiya həmin iki Ukrayna vilayətində mövcudluğunu gücləndirəcək və marşrutun təhlükəsizliyini təmin etmək üçün əlavə tədbirlər görəcək. “Bu, hər kəs üçün aydın olmalıdır”, – deyə Putin əlavə edib.
Rusiya baş nazirinin müavini Marat Xusnullin dövlət televiziyasına bildirib ki, zərəri qiymətləndirmək, eləcə də təmir qrafikini müəyyənləşdirmək üçün rəsmilərə təxminən bir həftə lazım olacaq. Rusiyanın dövlət xəbər agentliyi “TASS”-ın məlumatına görə, Xusnullin bəzi hissələri “bir-iki ay ərzində istifadəyə verə biləcəklərini” deyib.
Gəmilərin hərəkətini izləyən “VesselFinder” saytının məlumatına görə, cümə axşamı körpünün ən çox zədələnmiş hissəsinin yaxınlığında yedək gəmiləri və dibdərinləşdirən gəmi də daxil olmaqla yeddi gəmi yerləşdirilib.
Danimarkanın “COWI” konsaltinq şirkətinin konstruksiya mühəndisliyi üzrə mütəxəssisi İnqer Kroon təxminən 227 metr uzunluğundakı avtomobil yolu aşırımının və onun tağının dəyişdirilməsinin mürəkkəb, uzunmüddətli iş ola biləcəyini bildirib. “Yeni tağ aşırımı, böyük polad konstruksiya hazırlamaq lazımdır. 227 metr uzunluğunda adi ferma aşırımı quraşdırıb onun üzərindən çoxlu nəqliyyat vasitəsi keçirə bilməzsiniz”, – deyə o qeyd edib.
Kroon təmirin bir ildən xeyli çox çəkə biləcəyini ehtimal edib. Onun sözlərinə görə, əvəzləyici aşırım körpünün şimalında tikilməlidir, çünki onu mövcud dəmir yolu konstruksiyasının altından keçirmək mümkün deyil.
Kroon əlavə dayaqlar üzərində qurulacaq müvəqqəti avtomobil yolu aşırımının daha sürətli həll ola biləcəyini deyib. Bununla belə, dayaqların körpünün altından keçən gəmilərin hərəkətinə mane ola biləcəyi barədə xəbərdarlıq edib.