Çinin Nankin şəhərində batut gimnastikası və tamblinq üzrə keçirilən gənclər arasında dünya çempionatı və Dünya Yaş Qrupları Yarışlarının mükafatçıları Bakıya qayıdıblar. Azərbaycan təmsilçiləri noyabrın 17-də Vətənə dönüblər.
İdmançılarımız yarışlarda ümumilikdə üç medal qazanıblar: bir gümüş və iki bürünc.
Gənclər arasında dünya çempionatında Ammar Baxşəliyev batut gimnastikası üzrə fərdi proqramda 55,450 xal toplayaraq bürünc medal əldə edib. Bu, Azərbaycan batut gimnastikası tarixində gənclər arasında dünya çempionatının fərdi proqramında qazanılan ilk medal olub.
Dünya Yaş Qrupları Yarışlarında Bilal Qurbanov tamblinq üzrə 17–21 yaş kateqoriyasında 27 xalla gümüş medala sahib çıxıb. Batut gimnastikasının 13–14 yaş kateqoriyasındakı sinxron proqramında çıxış edən Muhamməd Həsənli və Ömər Qasımlı isə 46,160 xalla bürünc medal qazanıblar.