OMM Redaksiyası
“Liverpul”un sabiq yarımmüdafiəçisi Stiven Cerrard “Mançester Siti”nin İngiltərə Premyer Liqasının maliyyə qaydalarını pozması ilə bağlı iş üzrə mümkün cəzaları dəyərləndirib. O, klubun Çempionşipə göndərilməsini ədalətli hesab etmədiyini bildirib.
Cerrardın fikrincə, belə cəza “Mançester Siti”nin liqaya qayıtmaq və yenidən Premyer Liqada yer tutmaq imkanını saxlayar, eyni zamanda digər klublar hər həftə onunla qarşılaşmalı olardı. O, məsələyə birbaşa Premyer Liqada baxılmasını və cəzanın bir neçə mövsüm qüvvədə qalmasını təklif edib.
“Düşünürəm ki, müəyyən müddətə futbolçu qeydiyyatına qadağa qoyulmalı, komandadan müəyyən dövr ərzində xallar silinməlidir. Klub da digər komandaların doqquz və ya on il ərzində üzləşdiyi çətinlikləri yaşamalıdır”, – Cerrard “The Overlap” verilişində deyib. ESPN onun açıqlamasından sitat gətirib.
“Mançester Siti” 115 epizoddan 114-ü üzrə təqsirli bilinib. İttihamlar maliyyə məlumatlarının düzgün təqdim edilməməsi, futbolçulara və məşqçilərə ödənişlər, eləcə də maliyyə nəzarəti tələblərinə əməl olunmaması ilə bağlıdır.
