OMM Redaksiyası
Benin millisinin baş məşqçisinin köməkçisi Tünde Adelakun Lionel Messinin Argentina yığmasında keçirdiyi son oyundan sonra rəqib komandanın davranışını tənqid edib. Argentina millisi yoldaşlıq görüşündə Beninə 3:0 hesabı ilə qalib gəlib.
Adelakun öz müəllif saytında yazıb ki, final fitindən sonra Argentina futbolçularının Benin yığması ilə ünsiyyətdən yayınması və əl sıxmaların tələsik, formal xarakter daşıması xoşagəlməz olub. Onun sözlərinə görə, Benin oyunçularının Messiyə yaxınlaşmaq cəhdlərinə təhlükəsizlik əməkdaşları mane olublar.
Beninli məşqçi bildirib ki, gənc futbolçular Messi ilə görüşmək, şəkil çəkdirmək və əl sıxmaq istəyiblər. Adelakunun iddiasına görə, argentinalı futbolçular üçün fəxri dəhliz yaradılarkən həmin dəhlizdə dayanmaq istəyən Benin oyunçuları da təhlükəsizlik əməkdaşları tərəfindən uzaqlaşdırılıb.
Görüşdə hesabı 48-ci dəqiqədə Nikolas Otamendi açıb. 61-ci dəqiqədə Nikolas Pas fərqi artırıb, Messi isə 71-ci dəqiqədə yekun nəticəni müəyyənləşdirib. Messi matçda bir qol vurub və iki məhsuldar ötürmə verib.
