Vinisius qırmızı vərəqədən sonra La Liqa rəsmisini itələyib

“Real Madrid”in hücumçusu Vinisius Junior La Liqanın 8-ci turunda “Vilyarreal”la keçirilən matçda qırmızı vərəqə aldıqdan sonra liqanın oyunlar üzrə direktoru Luis Lopesi itələyib. Bu barədə DAZN jurnalisti İsaak Futo məlumat verib.

“Real Madrid” görüşdə 1:0 hesabı ilə qalib gəlib. Matçın yeganə qolunu 62-ci dəqiqədə Diomande vurub. Vinisius 73-cü dəqiqədə meydandan qovulub.

Futonun sözlərinə görə, braziliyalı futbolçu meydanı tərk edərkən VAR zonasının yaxınlığında Lopesə yaxınlaşıb və ona “Bərbad liqadır” deyib. Jurnalist bildirib ki, Vinisius həmin şəxsin La Liqa əməkdaşı olduğunu bilirmiş.

Baş hakim İsidro Dias de Mera 72-ci dəqiqədə Vinisiusun qolunu ləğv etdikdən sonra futbolçunu oyundan kənarlaşdırıb. Təkrar görüntülərə baxış zamanı “Real Madrid”in hücumçusunun rəqib yarımmüdafiəçi Natan Salibanın saçından tutduğu müəyyənləşib.

Protokolda hakimə qarşı aqressiv davranış qeydi olduğu üçün Vinisius daha uzun müddətə diskvalifikasiya oluna bilər.