OMM Redaksiyası
“Arsenal”ın sabiq hücumçusu İan Rayt “Mançester Siti”nin İngiltərə Premyer Liqasının maliyyə qaydalarını pozmasına görə misli görünməmiş cəza almalı olduğunu deyib.
“Şəhərlilər” 115 ittihamdan 114-ü üzrə təqsirli biliniblər. Rayt hadisəni “sənaye miqyasında dələduzluq” adlandırıb.
“Burada misli görünməmiş cəza tələb olunur. Bu, Premyer Liqa üçün ən mühüm gündür. Onlar bütöv bir ölkəyə meydan oxuyublar. Bu, çox çirkli işlərdir”, – deyə o bildirib.
Rayt qeyd edib ki, “Mançester Siti”nin növbəti oyunda “Liverpul”a səfəri klub üçün problem yarada bilər. Onun sözlərinə görə, vaxtilə məhz “Liverpul” “Mançester Siti”nin əsas rəqibi olub və Yurgen Klopp komandanı məğlub etmək üçün böyük səy göstərib.
“Bu, yəqin ki, Kloppa da təsir etdi. Çox kədərlidir. Çox güman, məsələ məhkəmə çəkişmələrinə qədər gedib çıxacaq”, – Rayt əlavə edib.
Qeyd edək ki, daha əvvəl “Mançester Siti”nin sabiq rəhbəri Devid Bernşteyn klubun idarə heyətinin vəzifədən kənarlaşdırılmasına çağırıb. Raytın açıqlamasını “Daily Mail” yayıb.
