Bolqarıstan Prezidenti Rumen Radev ölkə xalqına müraciəti zamanı vəzifəsindən istefa verəcəyini bəyan edib.
"Operativ Məlumat Mərkəzi-OMM" xəbər verir ki, Bolqarıstan Milli Televiziyası vasitəsilə yayımlanan müraciətdə dövlət başçısı çərşənbə axşamı rəsmi olaraq istefa ərizəsini təqdim edəcəyini bildirib.
Radev qeyd edib ki, onun gedişindən sonra dövlət başçısının səlahiyyətlərini vitse-prezident İliyana Yotova icra edəcək.
O, doqquz illik birgə fəaliyyətləri dövründə səmərəli əməkdaşlıq qurduqlarını vurğulayıb.
"Biz ümumi məqsəd ətrafında birləşmişdik. Əminəm ki, İliyana Yotova layiqli dövlət başçısı olacaq", - deyə Radev əlavə edib.
Məlumat üçün bildirək ki, Rumen Radev 2017-ci ildən Bolqarıstan prezidenti postunu tutur. O, 2021-ci ildə ikinci müddətə yenidən seçilib. Siyasətə gəlməzdən əvvəl peşəkar hərbçi olan Radev, Hərbi Hava Qüvvələrinin general-mayoru və ölkənin HHQ komandanı vəzifələrində çalışıb.
Bolqarıstan Konstitusiyasına əsasən, prezident istefa verdikdə seçkilərə qədər onun səlahiyyətləri müvəqqəti olaraq vitse-prezidentə keçir. Qeyd edək ki, Radevin istefası ölkədə uzun müddətdir davam edən siyasi böhran, tez-tez keçirilən növbədənkənar seçkilər və sabit hökumətin formalaşdırılmasında yaranan çətinliklər fonunda baş verir.
