"Azərbaycanla sülh şəraitində Rusiya ilə əməkdaşlıq da transformasiya olunacaq"

Ermənistanın Baş naziri Nikol Paşinyan İrəvanla Moskva arasında münasibətlərin transformasiya prosesində olduğunu bildirib.

“Operativ Məlumat Mərkəzi-OMM” xəbər verir ki, bununla bağlı "Sputnik Armenian" məlumat yayıb.

Paşinyan qeyd edib ki, Azərbaycanla Ermənistan arasında sülh əldə olunana qədər Rusiya ilə əməkdaşlığın təxminən 90 faizi təhlükəsizlik məsələlərinə yönəlib.

Onun sözlərinə görə, sülh şəraitində Ermənistan-Rusiya ikitərəfli münasibətlərinin xarakteri dəyişəcək, Rusiya ilə əməkdaşlıq da transformasiya olunacaq.

"Azərbaycan və Ermənistan arasında sülhün bərqərar olmasına qədər Rusiya ilə qarşılıqlı fəaliyyətimiz təxminən 90 faiz təhlükəsizlik məsələləri üzərində cəmlənmişdi", - Paşinyan bildirib.

Daha əvvəl Paşinyan Ermənistan və Rusiya arasındakı münasibətlərin qaçılmaz olaraq dəyişəcəyini, lakin İrəvanın Moskva ilə əlaqələri kəsmək niyyətində olmadığını açıqlamışdı.