Qəzza şəhərində balıqçı limanında yerləşən kafelərdən birinə endirilən hava zərbəsi nəticəsində azı 6 nəfər həyatını itirib, 14 nəfər isə yaralanıb.
“Operativ Məlumat Mərkəzi – OMM” xəbər verir ki, Fələstin rəsmilərinin məlumatına görə, İsrailin hava zərbəsindən sonra əraziyə ciddi ziyan dəyib və hadisə yerində dağıntılar yaranıb.
Şahidlərin sözlərinə görə, raket zərbələrindən sonra liman ərazisi dağıntılarla dolub. Münaqişə zamanı evlərini tərk etmək məcburiyyətində qalan fələstinli ailələrin müvəqqəti sığınacaq kimi istifadə etdiyi liman ərazisində çoxlu sayda insanın olduğu bildirilir.
İsrail ordusu isə zərbənin “Hamas” komandirləri və İsrail qüvvələrinə qarşı hücumlar planlaşdırdığı iddia edilən digər silahlıları hədəf aldığını açıqlayıb.
İsrail hərbçilərinin iddiasına görə, hədəfə alınan şəxslərdən biri 7 oktyabr 2023-cü ildə İsrailə qarşı həyata keçirilən hücumda iştirak edib. Lakin İsrail tərəfi bu iddiaları təsdiqləyən konkret sübutlar təqdim etməyib.
Hava zərbəsi ABŞ Prezidenti Donald Trampın kürəkəni və Yaxın Şərq üzrə əsas diplomatik nümayəndələrindən biri olan Cared Kuşnerin regiona səfərindən qısa müddət sonra baş verib.
Kuşnerin İsrailin Baş naziri Binyamin Netanyahu və digər vasitəçilərlə keçirdiyi görüşlərdə atəşkəs və müharibənin dayandırılması məsələsi müzakirə edilsə də, danışıqlarda nəzərəçarpacaq irəliləyiş əldə olunmayıb.
Tərəflər arasında əsas fikir ayrılıqları İsrail qüvvələrinin Qəzzadan geri çəkilməsi və “Hamas”ın tərksilah edilməsi məsələləri ətrafında cəmlənir.
“Hamas” İsraili ABŞ-nin sülh təşəbbüslərini sabotaj etməkdə ittiham edir. İsrail isə “Hamas” tam şəkildə tərksilah olunmayana qədər hərbi əməliyyatları davam etdirəcəyini bildirir.
Qəzzada yeni hücumlar və diplomatik danışıqlarda nəticənin əldə olunmaması ABŞ-nin təklif etdiyi sülh yol xəritəsinin gələcəyi ilə bağlı sualları daha da artırıb.
