Dünya bazarında "Azeri Light" markalı Azərbaycan neftinin bir barelinin qiyməti 1,82 ABŞ dolları və ya 1,62 % artaraq 114,14 ABŞ dollarına çatıb. Bu barədə neft bazarındakı mənbə "Operativ Məlumat Mərkəzi-OMM"-ə məlumat verib.
Hərracların son nəticələrinə görə, "Brent" markalı neftin iyul fyuçerslərinin dəyəri 111,71 ABŞ dolları təşkil edib. Türkiyənin Ceyhan limanında FOB bazasında satılan "Azeri Light" neftinin bir barelinin qiyməti isə 1,85 ABŞ dolları və ya 1,68 % bahalaşaraq 111,82 ABŞ dollarına yüksəlib.
Qeyd edək ki, Azərbaycanın cari il üçün dövlət büdcəsində bir barel neftin orta qiyməti 65 ABŞ dolları səviyyəsində nəzərdə tutulub.
Xatırladaq ki, "Azeri Light" neftinin tarixi ərzində ən aşağı qiyməti 2020-ci il aprelin 21-də (15,81 ABŞ dolları), ən yüksək qiyməti isə 2008-ci ilin iyul ayında (149,66 ABŞ dolları) qeydə alınıb. Sözügedən neft markası "Azəri-Çıraq-Günəşli" (AÇG) yataqlar blokunun işlənməsi haqqında müqavilə çərçivəsində hasil olunur. Müqavilədə Azərbaycan Dövlət Neft Şirkətinin (SOCAR) payı 31,65 % təşkil edir.
