Afət Ziyadqızı
ABŞ-nin Cənub Komandanlığı (SOUTHCOM) Şərqi Sakit okean hövzəsində narkotik ticarətinə qarşı əməliyyat keçirib. ABŞ hərbçiləri narkotik daşınmasında istifadə edildiyi bildirilən yanacaq daşıyan gəmini ələ keçirərək batırıblar.
“Operativ Məlumat Mərkəzi-OMM” xəbər verir ki, əməliyyat Ekvador hökuməti ilə əməkdaşlıq çərçivəsində həyata keçirilib.
Məlumata görə, gəminin “Los Choneros” narkotik karteli tərəfindən qeyri-qanuni daşımalar üçün istifadə olunduğu bildirilir. ABŞ Hərbi Dəniz Qüvvələrinin “USS San Antonio” döyüş gəmisindən hərəkətə keçən xüsusi təyinatlılar gəmiyə daxil olaraq nəzarəti ələ alıblar.
Axtarış tədbirlərindən sonra gəminin tamamilə boşaldıldığı və təhlükəsizlik məqsədilə batırıldığı qeyd olunub.
Gəmidə saxlanılan şəxslərin hüquqi prosedurların davam etdirilməsi üçün Ekvador rəsmilərinə təhvil veriləcəyi bildirilib.
ABŞ rəsmiləri əməliyyatın narkotik kartellərinin logistika şəbəkəsini zəiflətmək və narko-terror fəaliyyətinin qarşısını almaq məqsədi daşıdığını vurğulayıblar.
