OMM Redaksiyası
ABŞ Dövlət Departamenti İsrailə ümumi dəyəri təxminən 6,52 milyard dollar olan potensial xarici hərbi satış paketini təsdiqləyib.
"Operativ Məlumat Mərkəzi-OMM" Pentaqona istinadən xəbər verir ki, bu barədə Müdafiə Təhlükəsizliyi Əməkdaşlıq Agentliyi rəsmi bildiriş yayıb.
Hərbi yardım paketinin ən böyük hissəsini 3,8 milyard dollar dəyərində olan "AH-64E Apache" hücum helikopterləri və onlara aid avadanlıqlar təşkil edir.
Bu müqavilə üzrə əsas podratçıların "Boeing" və "Lockheed Martin" şirkətləri olacağı gözlənilir.
Paralel olaraq, Vaşinqton 1,98 milyard dollar dəyərində Birgə Yüngül Taktiki Maşınların (JLTV) satışına da yaşıl işıq yandırıb. Bu layihədə əsas icraçı qismində "AM General" şirkəti çıxış edəcək.
Agentliyin açıqlamasında bildirilir ki, nəzərdə tutulan satışlar İsrailin quru qoşunlarının hərəkətliliyini və əməliyyat imkanlarını artıracaq, həmçinin cari və gələcək təhdidlərlə mübarizə potensialını gücləndirəcək. Bundan əlavə, "Namer" zirehli personal daşıyıcıları üçün 740 milyon dollar dəyərində güc aqreqatlarının və logistik dəstək avadanlıqlarının satışı da təsdiqlənib. Bu bölmə üzrə əsas podratçı "Rolls-Royce Solutions America" olacaq.
Qeyd edək ki, bu qərar Qəzza zolağında davam edən hərbi əməliyyatlar fonunda ABŞ administrasiyasının tənqidlərlə üzləşdiyi bir vaxta təsadüf edir. 2023-cü ilin 7 oktyabrından bəri bölgədə 71 600-dən çox insan həlak olub. Aralarında Berni Sandersin də olduğu bir neçə amerikalı qanunverici, Vaşinqtonun müharibədə iştirakçı olmaması üçün İsrailə silah ötürülməsini dayandırmağa çağırıb.
