ABŞ İranın nüvə proqramı üzrə danışıqları bərpa etmək istəyir

ABŞ İranla danışıqlarda Tehranın nüvə proqramı məsələsinə qayıtmaq istəyir.

“Operativ Məlumat Mərkəzi-OMM” xəbər verir ki, bu barədə "CNN" məlumat yayıb.

Məlumata görə, ABŞ Prezidenti Donald Tramp administrasiyasının rəsmiləri Fars körfəzi ölkələrinin nümayəndələri ilə qapalı görüşlərdə bildiriblər ki, Vaşinqton gələcək ABŞ-İran danışıqlarının diqqətini Hörmüz boğazının yenidən açılması məsələsinə deyil, İranın nüvə proqramına yönəltmək niyyətindədir. İran nümayəndələri isə region ölkələrinə açıq şəkildə bildiriblər ki, nüvə proqramı ilə bağlı müzakirələrə yalnız Hörmüz boğazı məsələsi həll edildikdən və ABŞ-nin İran limanlarına tətbiq etdiyi blokada aradan qaldırıldıqdan sonra razılaşacaqlar.

Bildirilib ki, ABŞ və İsrail rejimi fevralın 28-də İrana qarşı müharibəyə başlayıb. İyun ayında Pakistanın vasitəçiliyi ilə Vaşinqton və Tehran bütün cəbhələrdə, o cümlədən Livanda hərbi əməliyyatların dərhal dayandırılmasını nəzərdə tutan anlaşma memorandumu imzalasa da, iyulun 8-də səhər tezdən ABŞ İrana qarşı genişmiqyaslı zərbələri yenidən bərpa edib.