OMM Redaksiyası
Ukrayna qüvvələri son 24 saat ərzində Rusiyanın müxtəlif bölgələrində səkkiz infrastruktura zərbə endirib. Bu barədə Ukrayna Prezidenti Volodimir Zelenski "X" platformasında məlumat yayıb.
Zelenskinin sözlərinə görə, hədəflər arasında Sibirin şimal-qərbində yerləşən Yamalo-Nenets Muxtar Dairəsindəki neft emalı zavodu və Şimali Qafqazdakı Dağıstan limanı olub. Moskva, Voronej, Həştərxan və Bryansk vilayətlərində də obyektlərin vurulduğu bildirilib.
Dağıstanın Xəzər dənizi sahilində yerləşən Mahaçqala şəhərində liman infrastrukturuna pilotsuz uçuş aparatları ilə endirilən zərbələr nəticəsində yanğın baş verib. Regional rəhbər vəzifəsini icra edən Fyodor Şçukin yanğının söndürüldüyünü açıqlayıb.
Rusiyanın Soçi şəhərində isə dəniz dronlarının hücumları nəticəsində səkkiz nəfər xəsarət alıb. Şəhərin sahil infrastrukturu qismən zərər görüb. Hadisə zamanı baş verən partlayışın görüntüləri "Reuters" tərəfindən yoxlanılıb.
Ukrayna Baş Qərargahı Rusiyanın gecə saatlarında ölkəyə 149 dronla hücum etdiyini, onlardan 128-nin məhv edildiyini bildirib. Rusiya Müdafiə Nazirliyi isə müxtəlif bölgələr üzərində 448 Ukrayna dronunun vurulduğunu açıqlayıb.
Ukraynanın Nikolayev vilayətində Rusiya hava zərbələri nəticəsində dörd nəfər ölüb, 19 nəfər yaralanıb. Sumı vilayətində dron hücumları beş nəfərin ölümünə, 24 nəfərin yaralanmasına səbəb olub.
Zelenski cümə axşamı Kanadanın Baş naziri Mark Karni ilə görüşəcək. Tərəflərin qış mövsümü üçün Ukraynanın hava hücumundan müdafiə hazırlıqlarını və iki ölkə arasında əməkdaşlığın gücləndirilməsini müzakirə edəcəyi gözlənilir.
Digər tərəfdən, "Reuters" Qərb rəsmilərinə istinadən NATO-nun bu ilin əvvəlində Arktika sularında sualtı kabellərə qarşı mümkün Rusiya əməliyyatının qarşısını aldığını yazıb. Məlumata görə, Britaniya, Norveç və ABŞ Rusiya gəmilərini izləyib və onların fəaliyyətini dayandırıb.
