OMM Redaksiyası
Fransa Prezidenti Emmanuel Makron Kanadanın sahillərindən təxminən 20-25 kilometr məsafədə yerləşən Sen-Pyer və Mikelon arxipelaqına səfər edib. O, sentyabrın 20-də burada Kanada Baş naziri Mark Karni ilə görüşəcək.
Görüş Avropa, Kanada və ABŞ arasında münasibətlərin həssas dövrünə təsadüf edir. Səfər həmçinin Fransanın Şimali Amerikada qalan yeganə ərazisi üzərində suverenliyinə dair mesaj kimi qiymətləndirilir.
Makronun prezident vəzifəsinə başladıqdan sonra Sen-Pyer və Mikelona ilk səfəridir. Bundan əvvəl adalara sonuncu dəfə 2014-cü ildə Fransanın keçmiş prezidenti Fransua Olland səfər edib.
Şimali Atlantikdə yerləşən arxipelaqın 6 mindən az sakini var. Fransa rəsmiləri ərazinin ölkəyə Kanada, ABŞ və Arktikaya yaxın Şimali Atlantikdə strateji mövcudluq imkanı verdiyini bildirirlər.
Səfərin diplomatik əhəmiyyəti ABŞ Prezidenti Donald Trampın bir neçə həftə əvvəl sosial şəbəkədə paylaşdığı xəritə ilə də bağlıdır. Həmin xəritədə Sen-Pyer və Mikelon, eləcə də bəzi Fransa Karib hövzəsi əraziləri ABŞ bayrağı ilə göstərilmişdi.
Makron və Karni enerji təhlükəsizliyi, iqtisadi əlaqələrin genişləndirilməsi, Arktikada təhlükəsizlik və Kanada-Avropa İttifaqı əməkdaşlığını müzakirə edəcəklər. Danışıqların enerji, kritik minerallar, müdafiə, süni intellekt və rəqəmsal ticarət sahələrini əhatə edəcəyi gözlənilir.
Karni ABŞ-dan asılılığı azaltmaq məqsədilə Kanada ilə Avropa İttifaqı arasında daha sıx münasibətlərin qurulmasını dəstəkləyir. Aİ Kanadanın ilk “assosiativ üzv” ola biləcəyi ilə bağlı fikir də irəli sürüb, lakin bu təşəbbüs hələ ilkin mərhələdədir.
Makron səfərdən sonra Nyu-Yorkda keçiriləcək BMT Baş Assambleyasına qatılacaq.
