OMM Redaksiyası
“Qarabağ” Misli Premyer Liqasında qolsuz oyunlar seriyasını üçə çatdırıb. Qurban Qurbanovun baş məşqçisi olduğu komanda son 15 mövsümdə ilk dəfə ardıcıl üç qarşılaşmada qol vura bilməyib.
“Sabah” və “Qəbələ” ilə qolsuz heç-heçələrdən sonra Ağdam klubu XI turda “Turan Tovuz”a 0:1 hesabı ilə uduzub.
“Qarabağ” sonuncu dəfə 2011/2012 mövsümündə ardıcıl üç matçda fərqlənə bilməyib. Komanda 2011-ci il avqustun 21-də səfərdə “Kəpəz”i 2:1 hesabı ilə məğlub etdikdən sonra sentyabrın 24-də AZAL-ı 3:1 hesabı ilə yenənədək üç oyunda qol vura bilməyib. Həmin müddətdə Ağdam klubu avqustun 27-də evdə “Qəbələ”yə, sentyabrın 17-də isə “Xəzər Lənkəran”a 0:1 hesabı ilə uduzub, sentyabrın 11-də Sumqayıtda eyniadlı komanda ilə 0:0 hesablı heç-heçə edib.
“Qarabağ”ın Azərbaycan çempionatlarındakı ən uzun qolsuz seriyası dörd matçdır. Bu göstərici iki dəfə qeydə alınıb. Ağdam klubu daha bir oyunda qol vura bilməsə, antirekordunu təkrarlayacaq.
Komanda ardıcıl dörd oyunda qələbə qazana bilməməklə də son 11 mövsümdə ilk dəfə belə seriya ilə üzləşib. “Qarabağ” bu halla sonuncu dəfə 2015/2016 mövsümündə qarşılaşıb.
