Misli Premyer Liqasında XI tura bu gün start veriləcək

Misli Premyer Liqasında I dövrənin XI turuna noyabrın 6-da start veriləcək. İlk oyun günündə iki qarşılaşma baş tutacaq.

Günün oyunları

Saat 18:00-da “Qarabağ” “Azərsun Arena”da “Turan Tovuz”la üz-üzə gələcək. Ağdam klubu 19 xalla turnir cədvəlinin üçüncü, Tovuz təmsilçisi isə 18 xalla dördüncü pilləsindədir. Matçın baş hakimi Fərid Hacıyev olacaq. Ona Asiman Əzizli, Rəhman İmami və Vüqar Həsənli kömək edəcək. VAR hakimi Tural Qurbanov, AVAR hakimi Tərlan Talıbzadə, hakim-inspektor Şahin Cəfərov, AFFA nümayəndəsi isə Elgiz Abbasov olacaq.

Saat 20:00-da “Neftçi” “Palms Sports Arena”da “Kəpəz”i qəbul edəcək. 21 xalla lider olan “Neftçi” 17 xalla beşinci yerdə qərarlaşan Gəncə klubu ilə qarşılaşacaq. Oyunu Rəşad Əhmədov idarə edəcək. Köməkçi hakimlər Kamran Bayramov, Teymur Teymurov və Niyaz Əhmədov, VAR hakimi Əli Əliyev, AVAR hakimi Zöhrab Abbasov, hakim-inspektor Orxan Məmmədov, AFFA nümayəndəsi Erkin Hüseynov olacaq.

XI tura noyabrın 8-də yekun vurulacaq.