OMM Redaksiyası
ABŞ Prezidenti Donald Tramp Nyu-Yorkda keçirilən BMT Baş Assambleyasının 81-ci sessiyasının yüksək səviyyəli debatında çıxış edib.
Tramp BMT-yə gələrkən jurnalistlərə açıqlamasında Rusiya Prezidenti Vladimir Putinə mesajının “müharibəni bitirmək” olduğunu deyib. Qısa açıqlama Ukraynadakı müharibənin sona çatdırılması istiqamətində davam edən səylər fonunda verilib.
BMT-də əsas müzakirə mövzuları
Baş Assambleyanın builki debatlarında İran və Ukrayna ilə bağlı müharibələrin, qlobal təhlükəsizliyin, iqlim dəyişikliyinin və süni intellektin əsas mövzular sırasında olacağı gözlənilir.
Təxminən 130 dövlət və hökumət başçısının qatılacağı tədbir “Etimadı bərpa etmək, transformasiyanı idarə etmək: hamı üçün nəticə verən Birləşmiş Millətlər Təşkilatı” mövzusuna həsr olunub.
BMT-nin baş katibi Antonio Quterreş dünya liderlərini Baş Assambleyanın yüksək səviyyəli həftəsindən Yaxın Şərqdə gərginliyin azaldılması və dialoqun təşviqi üçün istifadə etməyə çağırıb.
Netanyahu BMT-də çıxış edəcək
İsrailin Baş naziri Benyamin Netanyahu BMT Baş Assambleyasında çıxış etmək üçün Nyu-Yorka qısa səfər edəcək. O, cümə axşamı çıxış etdikdən bir neçə saat sonra İsrailə qayıtmağı planlaşdırır.
“Haaretz” qəzetinin məlumatına görə, Netanyahunun ABŞ Prezidenti Donald Trampla görüşü gözlənilmir. İsrail hökumət başçısı çıxışından əvvəl Nyu-York meri Zöhran Mamdanini tənqid edib və Assambleyada “həqiqəti açıqlayacağını” bildirib.
İran Prezidenti Məsud Pezeşkianın çərşənbə günü, Ukrayna Prezidenti Volodimir Zelenskinin də həmin gün dünya liderlərinə müraciət edəcəyi gözlənilir. Rusiyanın xarici işlər naziri Sergey Lavrovun çıxışı isə şənbə gününə planlaşdırılıb.
Sessiyanın gündəliyi
Yüksək səviyyəli ümumi debat bir həftə davam edəcək. Diplomatlar və dövlət liderləri çıxışlarında qlobal böhranlar, çoxtərəfli əməkdaşlığın gələcəyi və BMT-nin fəaliyyətinin səmərəliliyi barədə danışacaqlar.
Həmçinin BMT-nin baş katibi Antonio Quterreşin dekabrın 31-də başa çatacaq ikinci müddətindən sonra onun xələfinin seçilməsi prosesi də müzakirə olunacaq.
