Yasamal rayonunda mənzillərin giriş qapılarını yoxlayan naməlum şəxs, açıq qapılı evlərdən birinə daxil olaraq 900 manat nağd pul və 38 800 manat dəyərində qızıl-zinət əşyaları oğurlayıb.
Bu barədə "Operativ Məlumat Mərkəzi-OMM"-ə Daxili İşlər Nazirliyindən (DİN) məlumat verilib.
Məlumata görə, diqqət çəkməmək məqsədilə müxtəlif geyimlərdən istifadə edən şübhəli şəxsin müəyyənləşdirilməsi üçün Yasamal Rayon Polis İdarəsinin əməkdaşları əməliyyat keçirib. Nəticədə Mətanət Hüseynova şübhəli şəxs qismində saxlanılıb. Onun üzərindən oğurlanan qızıl-zinət əşyalarının bir qismi aşkar edilərək maddi sübut kimi götürülüb.
Faktla bağlı Cinayət Məcəlləsinin oğurluq maddəsi ilə cinayət işi başlanılıb. Hazırda talınmış əmlakın qalan hissəsinin aşkar edilməsi və digər mümkün oğurluq halları ilə bağlı istintaq tədbirləri davam etdirilir.
DİN vətəndaşları mənzillərin giriş qapılarını açıq saxlamamağa, şəxsi əmlakın təhlükəsizliyinə diqqətlə yanaşmağa və şübhəli hallarla qarşılaşdıqda dərhal polisə məlumat verməyə çağırıb.
