OMM Redaksiyası
Nərmin Abdinova Yunanıstanın Krit adasındakı Hersonissos şəhərində keçirilən yeniyetmələr arasında Avropa çempionatında 18 yaşadək qızların yarışında qızıl medal qazanıb. O, doqquz görüşün hamısında qalib gələrək 9 xal toplayıb və çempionluğunu son turdan əvvəl təmin edib. Abdinova son turda FİDE təmsilçisi Lizaveta Lyaşkeviçi də məğlub edib.
Avropa Şahmat İttifaqı, FİDE və “Chess-Results” bazasının arxivləri, eləcə də əvvəlki turnirlərin protokolları üzrə araşdırmaya əsasən, 18 yaşadək qızlar və oğlanlar arasında Avropa çempionatında bundan əvvəl heç bir qalib doqquz görüşün hamısında qələbə qazanmayıb. Mövcud tarixi məlumatlara görə, Abdinova bu yaş qrupunda bütün görüşlərini udan ilk şahmatçıdır.
Polşalı Mateuş Bartel 2003-cü ildə 18 yaşadək oğlanların yarışında 8,5 xalla çempion olub. Azərbaycanın Ülviyyə Fətəliyeva isə 2014-cü ildə həmin yaş qrupunda 8 xal toplayaraq birinci yeri tutub. Azərbaycan şahmatçılarının Avropa çempionatlarında əvvəlki nəticələri arasında ən yüksək göstəricilərdən birinə Gövhər Beydullayeva imza atıb: o, 2017-ci ildə 14 yaşadək qızların yarışında 8,5 xal toplayıb.
Abdinovanın qələbəsi Azərbaycan üçün də ilk belə nəticədir: ölkə təmsilçiləri əvvəlki Avropa çempionatlarının heç bir yaş qrupunda 9 mümkün xalı toplamayiblər. Abdinova gümüş medalçı polşalı Klara Şotkanı və bürünc mükafatçı ukraynalı Sofiya Moskaletsi 2 xal qabaqlayıb. O, 12 illik fasilədən sonra 18 yaşadək qızlarda Avropa çempionluğunu Azərbaycana qaytarıb.
Azərbaycan şahmatçıları çempionatda daha iki medal qazanıblar. Tunar Davudov 18 yaşadək oğlanlar arasında 7 xalla gümüş, Selin Məmmədova isə 8 yaşadək qızların yarışında eyni nəticə ilə bürünc medal əldə edib. Azərbaycan Şahmat Federasiyasının şahmatın inkişafı istiqamətindəki işləri, o cümlədən “Chess Tour Azerbaijan” seriyası çərçivəsində təşkil olunan turnirlər də bu sahədə görülən işlər sırasındadır.
