Afət Ziyadqızı
Qərbi Yamaquçi əyalətinin Şimonoseki şəhəri sahillərində Cənubi Koreya bayrağı altında kimyəvi yük daşıyan tanker çevrilib.
"Operativ Məlumat Mərkəzi-OMM" xəbər verir ki, bu barədə NHK dövlət televiziyası məlumat verib.
"KEOYOUNG SUN" adlı 870 tonluq tankerdən edilən kömək çağırışında, Şimonoseki sahillərində Mutsure adasının şimal-qərbində lövbər salan tankerin çevrildiyi bildirilib.
Cənubi Koreyada yerləşən Yonhap agentliyinin xəbərində tankerin güclü külək və yüksək dalğalar səbəbindən ada kənarında lövbər saldığı bildirilib.
Hadisə zamanı tankerdə 8 İndoneziya, 2 Cənubi Koreya və 1 Çin olmaqla ümumilikdə 11 ekipaj üzvü olduğu və onlardan 6-nın xilas edildiyi paylaşılıb.
Kyodo agentliyinin yerli rəsmilərə əsaslanaraq verdiyi xəbərə görə, itkin düşən 5 nəfərin axtarış-xilasetmə işləri təyyarə və patrul gəmiləri ilə davam etdirilir.
Yaponiya Sahil Mühafizəsi bildirib ki, uzunluğu 68,8 metr və eni 10,6 metr olan tankerdə 980 ton akril turşusu olub.
