OMM Redaksiyası
“Neftçi”nin baş məşqçisi Yuri Vernidub Misli Premyer Liqasının doqquzuncu turunda “Turan Tovuz”la 1:1 hesablı heç-heçədən sonra keçirilən mətbuat konfransında komandasının çıxışını şərh edib.
Ukraynalı mütəxəssisin sözlərinə görə, rəqib ilk 20 dəqiqədə daha təhlükəli oynayıb, müdafiəçinin səhvindən sonra “Neftçi” azlıqda qalıb. Buna baxmayaraq, komanda qol vuraraq fasiləyə üstün yollanıb. İkinci hissədə 5-3-1 düzülüşünə keçdiklərini, qola qədər rəqibə imkan vermədiklərini deyən Vernidub qapıçı Emil Balayevə təşəkkür edib. O, məğlub olmadıqlarına görə razı qala biləcəklərini, amma iki xal itirdiklərini və hər oyunda qazanmaq istədiyini bildirib.
Vernidub İqor Ribeyronun qırmızı vərəqə aldığı epizodda müdafiəçinin topa daha tez çatmalı olduğunu söyləyib. Onun fikrincə, futbolçunun rəqibə qarşı xüsusi aqressiyası olmayıb və qəsdən zədələmək niyyəti güdməyib. Məşqçi “Turan Tovuz”la görüşlərdə Ribeyronun üçüncü dəfə qırmızı vərəqə almasına da münasibət bildirib. O, İvan Petryakın “Dinamo” – “Kudrivka” matçında baş-başa toqquşmadan sonra kəllə sümüyünün sınığı ilə nəticələnən ağır zədəsini xatırladaraq, futbolçuların sağlamlığının əsas olduğunu vurğulayıb.
Baş məşqçi “Qarabağ”, “Sabah”, “Turan Tovuz” və “Zirə”yə qarşı qələbə qazana bilməməyin ona ağır təsir etdiyini deyib. “Qarabağ”la oyunda 3:1 öndə olsalar da, matç 3:3 bitib; “Sabah”la görüşdə də qələbə şansları olub. Vernidub bu rəqiblərə artıq uduzmadıqlarını və onlarla bərabər mübarizə apardıqlarını qeyd edib.
O, Emin Mahmudovun yüngül zədə səbəbindən oyunun iştirak ərizəsinə salınmadığını açıqlayıb. Vernidub Bakıda keçirilən U-15 dünya çempionatının oyunlarını izləmək üçün qrafikinə baxacağını, lakin iş yükünə görə vaxt tapmağın çətin ola biləcəyini söyləyib. Komandadakı təhlillərin yaxşı keçdiyini, məşqlərdə ispan, fransız və ingilis dillərindən istifadə olunduğunu, tərcüməçilərin olsa da, bəzilərinin deyilənləri tam anlamaya biləcəyini bildirib. Azərbaycan dilini öyrənməyin onun üçün daha rahat olduğunu da əlavə edib.
