OMM Redaksiyası
İsrail Premyer Liqasının səkkizinci turunda Azərbaycan millisinin yarımmüdafiəçisi Rüfət Abdullazadənin çıxış etdiyi “Kiryat Şmona” öz meydanında “Bney Saxnin”lə qarşılaşıb. Görüş qonaqların 1:0 hesablı qələbəsi ilə başa çatıb.
Matçın yeganə qolu 40-cı dəqiqədə vurulub. Sana Qomes fərqlənib, qol ötürməsini isə Metyu Anim Koco verib.
Rüfət Abdullazadə oyuna start heyətində başlayıb. 21 nömrəli formada çıxış edən Azərbaycan millisinin üzvü 56-cı dəqiqədə Şay Sabah ilə əvəzlənib.
Topa daha çox nəzarət edən meydan sahibləri məğlubiyyətdən qaça bilməyiblər. “Kiryat Şmona” topa 60 faiz sahib olub. Hər iki komanda rəqib qapısına 12 zərbə endirib.
Bu nəticədən sonra üç xalda qalan “Kiryat Şmona” turnir cədvəlinin 13-cü pilləsində qərarlaşıb.
