OMM Redaksiyası
“Neftçi” basketbol klubu FIBA Avropa Kubokunda İsveçrənin “Fribur Olimpik” komandasına 73:78 hesabı ilə məğlub olub. Bakı təmsilçisinin baş məşqçisi Konstantinos Vasiliadis görüşdən sonra komandasının oyununu şərh edib.
Mütəxəssisin sözlərinə görə, “Neftçi” yalnız ilk periodda yaxşı çıxış edib. Komanda matça uğurlu başlayıb, hücumda və müdafiədə az səhvə yol verib, yaratdığı imkanlardan yararlanıb. Lakin ikinci perioddan görüşün sonunadək səhvlərin sayı artıb.
“19 dəfə top itirmək yolverilməzdir”
Vasiliadis səfər oyununda 19 dəfə top itirməyin yolverilməz olduğunu deyib. O, komandanın hücum üçün yaxşı imkanlar əldə etsə də, onlardan istifadə edə bilmədiyini, üçxallıq atışlarda qeyri-dəqiq olduğunu vurğulayıb. Baş məşqçi müdafiədən hücuma keçiddə, xüsusilə fərdi müdafiədə zəif oynadıqlarını və rəqibə təkbətək vəziyyətlərdə sərbəstlik verdiklərini qeyd edib.
“Təxminən 30 dəqiqə pis oynadıq, amma buna baxmayaraq, cəmi beş xal fərqi ilə məğlub olduq. Bu, komandamızın potensialı və istedadı olduğunu göstərir. Problem bütün 40 dəqiqə ərzində lazımi psixoloji hazırlığı və diqqəti qoruya bilməməyimizdir. Bunun üzərində işləməli, inkişaf etməliyik”, – deyə Vasiliadis bildirib.
“Gəncə” ilə oyuna hazırlaşacaqlar
Baş məşqçi komandanın cümə günü məşqdə buraxdığı səhvləri təhlil edəcəyini, daha sonra diqqətini Azərbaycan çempionatında “Gəncə” ilə görüşə yönəldəcəyini söyləyib. Vasiliadis bu oyunun onlar üçün vacib olduğunu və ölkə çempionatında ardıcıl üçüncü qələbəni qazanmaq istədiklərini deyib.
