OMM Redaksiyası
“LANDAU Lions”un baş məşqçisi Erhan Toker FIBA Avropa Kubokunda Slovakiyanın “Prievidza” komandası ilə keçiriləcək qarşılaşma öncəsi fikirlərini bölüşüb. Türkiyəli mütəxəssis səfərə hazırlıq və oyunçuların durumu barədə danışıb.
Tokerin sözlərinə görə, komanda NTD ilə matçdan sonra yola çıxıb və Prievidzaya çatmaq üçün təxminən 12 saat yol gedib. Basketbolçular yorulsalar da, əsas məşqədək dincəlmək imkanı tapıblar.
Baş məşqçi mərkəz oyunçusu Arnas Sakenisin son məşqdə özünü yoxladığını, onun meydana çıxıb-çıxmayacağının oyun vaxtı bəlli olacağını bildirib. Toker səfərdə “Cenevrə” ilə müqayisədə daha yaxşı çıxış etməyə çalışacaqlarını deyib.
“Bu qrup oyunlarının tempinə alışmalıyıq. Matçda kifayət qədər enerjili olsaq, yaxşı oyun göstərə bilərik. İlk növbədə aqressiv oynaya bilsək, hücumda da yaxşı olacağıq”, – deyə mütəxəssis vurğulayıb.
Qeyd edək ki, “LANDAU Lions” son matçında NTD-ni 102:68 hesabı ilə məğlub edib.
