OMM Redaksiyası
Azərbaycan Cüdo Federasiyasının icraçı vitse-prezidenti Rəşad Rəsullu qadın idmançıların çıxışlarına ümid bəslədiyini bildirib. O, Bakı-2026 cüdo üzrə dünya çempionatının yekunlarına həsr olunan mətbuat konfransında qadın cüdoçuların artıq ilk mərhələdə mübarizəni dayandırmadıqlarını deyib.
Rəsullu ölkədə qadın cüdosunun kişi cüdosundan geri qaldığını etiraf edib. Onun sözlərinə görə, federasiya vəziyyətin yaxşılaşdırılması üçün məsuliyyətini dərk edir və bu istiqamətdə əlindən gələni edəcək.
Federasiya rəsmisi qadın cüdoçuların sayını artırmağı planlaşdırdıqlarını qeyd edib. İdmançıların sayının çoxalmasının ölkədaxili rəqabəti gücləndirəcəyini və uğur qazanmaq imkanlarını artıracağını vurğulayıb.
Cüdo üzrə dünya çempionatı oktyabrın 4-dən 11-dək Bakıda keçirilib. Azərbaycan millisi yarışda bir qızıl, iki gümüş və dörd bürünc medal qazanaraq böyüklər arasında dünya çempionatlarında medal sayına görə milli rekord müəyyənləşdirib.
Əhməd Yusifov (60 kq) dünya çempionu olub. Zelim Tçkayev (81 kq) və Uşanqi Kokauri (100 kq-dan yuxarı) gümüş, Rəşid Məmmədəliyev (73 kq), Ömər Rəcəbli (81 kq), Murad Fətiyev (90 kq) və Kənan Nəsibov (100 kq-dan yuxarı) bürünc medal qazanıblar.
