OMM Redaksiyası
Azərbaycanın yunan-Roma güləşçisi Elmir Əliyev ABŞ-nin Las-Veqas şəhərində keçirilən U-23 dünya çempionatında gümüş medal qazanıb. O, final görüşündə Qazaxıstan təmsilçisi Aybek Aytbekova 4:13 hesabı ilə məğlub olub.
Əliyev finaldakı məğlubiyyətin səbəbləri barədə danışarkən əsas səhvinin vaxtında düzgün taktiki dəyişiklik etməməsi və həddindən artıq tələsməsi olduğunu deyib.
Güləşçinin sözlərinə görə, finala qədər bütün görüşlərdə qalib gəlməsi ona özünəinam verib. O, həmin qarşılaşmalarda özünə və qələbə qazanacağına inandığını bildirib.
“Mən gümüş medalla kifayətlənən idmançılardan deyiləm. Məqsədim hər zaman çempion olmaqdır. Bu dəfə də çempionluğa çox yaxın idim və qızıl medal qazanacağıma inanırdım. Ancaq alınmadı”, – Əliyev deyib.
O, komanda yoldaşlarının da uğurlu çıxış etməsini arzuladığını bildirib. Əliyevin sözlərinə görə, idmanda hər zaman istənilən nəticəni əldə etmək mümkün olmur və o, bütün komanda yoldaşlarına gələcək yarışlarda qələbələr arzulayır.
