OMM Redaksiyası
ABŞ-nin Las-Veqas şəhərində keçirilən güləş üzrə U-23 dünya çempionatında üçüncü yeri tutan Ruslan Nurullayev yarışa hazırlığından və qızıl medal qazanmasına mane olan səhvlərdən danışıb.
Yunan-Roma güləşçisi bildirib ki, mundiala yaxşı hazırlaşmış və çempionluq məqsədilə yollanmışdı. İlk görüşdə məğlub olan Nurullayev sonrakı qarşılaşmalarda qalib gələrək bürünc medal qazanıb. Onun sözlərinə görə, buraxdığı səhvlər olmasaydı, çempion ola bilərdi. Güləşçi həmin səhvləri düzəltmək üçün vaxtının olduğunu və 77 kq çəki dərəcəsinin onun üçün daha uyğun olacağına inandığını deyib.
Əvvəllər 72 kq-da çıxış edən idmançı olimpiya çəki dərəcəsi olan 77 kq-a keçidini qarşıdan gələn olimpiya ili və gələn ildən reytinq turnirlərində lisenziya xallarının verilməsi ilə əlaqələndirib. Nurullayev bu qərarı məşqçiləri ilə məsləhətləşdikdən sonra verdiyini bildirib.
Güləşçi U-23 dünya çempionatında rəqiblərinin böyüklər arasında beynəlxalq arenada da çıxış etdiyini vurğulayıb. Gələn il bu yaş qrupunda son dəfə yarışa biləcəyini deyən Nurullayev titul qazanmağa çalışacağını bildirib. Onun əsas hədəfi Olimpiya Oyunlarına lisenziya əldə etməkdir.
