OMM Redaksiyası
“Neftçi”nin baş məşqçisi Kostas Vasiliadis Azərbaycan basketbolçularının Avropada diqqət çəkməsi üçün daha çox məşq etməli və oyunlarda özlərini göstərmək imkanı qazanmalı olduqlarını deyib. Yunanıstanlı mütəxəssis bu fikirləri FIBA Avropa Kubokunda VEF-ə 94:110 hesabı ilə uduzduqları görüşdən sonra keçirilən mətbuat konfransında səsləndirib.
Vasiliadis 16 yaşında gündə bir neçə məşqə qatıldığını, bunun basketbolçu kimi inkişafına və özünəinamına kömək etdiyini bildirib. Onun sözlərinə görə, gənc yaşlarında məşqçisi ona əvvəlcə beş, sonrakı mövsümdə 15, 18 yaşında isə 20–25 dəqiqə oynamaq imkanı yaradıb. Baş məşqçi yerli gənclərə də səhv etmək və meydanda təcrübə toplamaq şansı verilməli olduğunu vurğulayıb.
Məşq şəraiti və oyun təcrübəsi
“Neftçi”nin çalışdırıcısı komandanın zal problemi olduğunu, bəzi günlərdə isə bayram səbəbindən məşq edə bilmədiklərini qeyd edib. O, yerli basketbolçuların kiçik yaşlarından idman zalında daha çox vaxt keçirməsinin vacibliyini bildirib.
Vasiliadis Azərbaycan oyunçularının istedadlı olduğunu və onların xarici klublara keçməsinə kömək etməyə hazır olduğunu deyib. Bununla belə, komandasındakı gənclərin onun tələb etdiyi iş rejiminə hələ tam uyğunlaşmadığını söyləyib: “Məşq edirsənsə, oynayacaqsan”.
