OMM Redaksiyası
Rusiyanın Ukraynanın mərkəz-şimalında yerləşən Prylukı şəhərində təsərrüfat anbarlarına endirdiyi zərbə nəticəsində azı üç nəfər həlak olub. Yerli polis bildirib ki, hücum zamanı daha yeddi nəfər yaralanıb.
Ukrayna rəsmilərinin məlumatına görə, Rusiya qüvvələri son 24 saat ərzində şimal-şərqdəki Xarkov şəhərinə də pilotsuz uçuş aparatları və idarəolunan bombalarla zərbələr endirib. Xarkov vilayətinin qubernatoru Oleq Sinequbov dörd nəfərin yaralandığını açıqlayıb.
Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas Ukrayna ilə Polşa sərhədi yaxınlığında sərnişin qatarına hücumun Kiyevi dəstəkləyən Qərb ölkələrini qorxutmaq məqsədi daşıdığını bildirib.
Ukraynanın məlumatına görə, pilotsuz aparat Polşa sərhədi yaxınlığındakı Yaqodin stansiyasının yaxınlığında lokomotivə zərbə endirib. Hücumdan əvvəl pilotsuz aparatın aşkar edildiyi və sərnişinlərə təxliyəyə hazırlaşmaq barədə göstəriş verildiyi bildirilib. Hadisə nəticəsində ölən və yaralanan olmayıb.
Avropa İttifaqı Ukrayna-Polşa sərhədi yaxınlığındakı Rusiya zərbələrini, o cümlədən sərnişin qatarına hücumu qətiyyətlə pisləyib. Aİ-nin son olaraq Ukraynanın hava və raketdən müdafiəsinə 6,1 milyard avro və ya 7 milyard dollar yardım ayırdığı qeyd olunub.
Polşanın Baş naziri Donald Tusk hadisədən sonra hökumət üzvləri, hərbi və kəşfiyyat rəsmiləri ilə təcili toplantı keçirib. Polşa müdafiə naziri Sezari Tomçik isə qış fəslinin Rusiya-Ukrayna müharibəsi üçün “dönüş nöqtəsi” ola biləcəyini deyib.
Rusiya Müdafiə Nazirliyinin məlumatına əsasən, ölkənin hava hücumundan müdafiə sistemləri gecə saatlarında Rusiya və Qara dəniz üzərində 399 Ukrayna pilotsuz aparatını vurub. Rusiyanın Soçi şəhərində də gecə saatlarında pilotsuz aparat hücumları qeydə alınıb və beş nəfər, o cümlədən bir uşaq yaralanıb.
