Afət Ziyadqızı
İsrailin baş naziri Benyamin Netanyahu ilə ABŞ prezidenti Donald Tramp arasında keçirilən telefon danışığı zamanı İrana yeni zərbələrin endirilməsi məsələsində kəskin mübahisənin yarandığı iddia olunur.
“Operativ Məlumat Mərkəzi-OMM” "Lenta.ru"ya istinadən xəbər verir ki, bu barədə İsrailin "Ynet" portalı məlumat yayıb.
"Ynet"in mənbələri iki lider arasında İran İslam Respublikasına qarşı növbəti hərbi addımlarla bağlı ciddi fikir ayrılıqlarının olduğunu bildiriblər. Mənbələrdən biri danışığı "yüksək tonlarda cəhənnəm mübahisəsi" kimi qiymətləndirib.
Lakin İsrail Baş Nazirinin Ofisi yayılan məlumatları dərhal təkzib edərək, telefon danışığının "tamamilə sakit" keçdiyini vurğulayıb. İsrailin yüksəkvəzifəli rəsmilərindən biri də zəngin baş tutduğunu təsdiqləsə də, söhbətin gərgin keçmədiyini bildirib.
"Financial Times" qəzeti isə bundan əvvəl Netanyahunun İrana qarşı döyüş əməliyyatlarının bərpa edilməsi xahişi ilə demək olar ki, hər gün Trampa zəng etdiyini yazmışdı.
ABŞ prezidenti Donald Tramp telefon danışığında Netanyahudan Qəzza zolağı üzrə sülh planının icrasına başlamağı tələb edib. Vaşinqton HƏMAS-ın tərksilah edilməsini, anklavın demilitarizasiyasını və Qəzzanın idarəçiliyinin yeni Fələstin texnokrat hökumətinə verilməsini nəzərdə tutan planın reallaşması üçün konkret addımlar atılmasını istəyir.
Qəzza üzrə yol xəritəsi İsraildə oktyabrın 27-də keçirilən seçkilərə görə dayandırılmışdı. Ağ Ev seçki kampaniyası dövründə planın siyasi manevr alətinə çevrilməsini istəmirdi. Indi isə Tramp hökuməti kimin formalaşdırmasından asılı olmayaraq prosesi irəli aparmaq niyyətindədir. Noyabrın 7-də İsrail prezidenti İsxak Hersoq hökuməti qurmağı müxalifət lideri Qadi Ayzenkota tapşırıb və Vaşinqtonun Netanyahunun hakimiyyətə qayıtmasının qarşısını almaq üçün Ayzenkotla təmasda olduğu bildirilir.
ABŞ və İsrailin İrana qarşı genişmiqyaslı hərbi əməliyyatları artıq 256 gündür davam edir. Fevralın 28-də başlayan münaqişə fonunda İran Hörmüz boğazını bağlayaraq neft-qaz ixracını dayandırıb. İyun ayında tərəflər arasında İslamabad anlaşma memorandumu imzalansa da, iyulun 8-də ABŞ İranı razılaşmanı pozmaqda ittiham edərək zərbələri bərpa edib.
