OMM Redaksiyası
ABŞ prezidenti Donald Trampın çərşənbə günü Ağ Evdə keçiriləcək tədbirdə amerikalıları saxta kriptovalyuta investisiyaları ilə hədəf alan xarici cinayətkar şəbəkələrə qarşı mübarizədən danışacağı gözlənilir. AnewZ-in məlumatına görə, Ağ Evin rəsmisi bu barədə “Reuters”ə bildirib.
Rəsminin sözlərinə görə, tədbirdə kibercinayətkarlığın qarşısının alınması, saxta kriptovalyuta investisiya saytlarının müsadirəsi və internetdə başqalarının adından istifadə etməklə törədilən fırıldaqlara qarşı mübarizə müzakirə olunacaq.
Tədbirdə FTB direktoru Kaş Patel, müdafiə naziri Pit Heqset, baş prokuror Todd Blanş və Ağ Evin aparat rəhbəri Syuzie Vaylsın iştirakı gözlənilir.
FTB-nin hesabatına əsasən, amerikalılar 2025-ci ildə internet fırıldaqları ilə bağlı quruma bir milyondan çox şikayət göndəriblər. Bu, 2024-cü illə müqayisədə 17 faiz çoxdur.
Tramp ailəsinin kriptovalyuta fəaliyyəti
Tədbir Tramp ailəsinin kriptovalyuta sektorunda fəaliyyətini genişləndirdiyi dövrə təsadüf edir.
“Reuters”in araşdırmasına görə, Tramp və oğullarının əsas kriptovalyuta təşəbbüsləri ailənin sərvətinə ən azı 2,3 milyard dollar əlavə edib. Həmin təşəbbüslərə cəlb edilmiş investorlar isə 2,3 milyard dollar itiriblər.
Araşdırmaya cavab olaraq, Ağ Evin sözçüsü Anna Kelli “Reuters”ə deyib: «Prezident Trampın və onun administrasiyasının bütün addımları Amerika xalqının maraqları naminə atılır».
2025-ci ilin oktyabrında Tramp “Binance” kriptovalyuta birjasının qurucusu Çanpen Çjaonu əfv edib. Şirkət çirkli pulların yuyulmasına qarşı effektiv proqramı təmin etmədiyini etiraf etdikdən sonra Çjao bu iş üzrə məhkum edilmişdi.
Bu ilin martında Tramp onlayn fırıldaqlara görə məsuliyyət daşıyan şəxslərin müəyyənləşdirilməsi və cinayət məsuliyyətinə cəlb olunmasına üstünlük verilməsi barədə göstəriş verən sərəncam imzalayıb. Daha sonra o, Daxili Təhlükəsizlik Nazirliyinə xarici cinayətkar haker qruplarının fəaliyyətini izləmək üçün özəl şirkətlərlə əməkdaşlıq etməyi tapşırıb.
