"Tehran Vaşinqtona təklif təqdim edib" - Əraqçi

"İran bu həftə üçüncü tərəflərin vasitəçiliyi ilə ABŞ rəsmiləri ilə keçirilən görüş zamanı Vaşinqtona yeni təklif təqdim edib".

“Operativ Məlumat Mərkəzi-OMM” xəbər verir ki, bu sözləri İranın xarici işlər naziri Abbas Əraqçi deyib.

Əraqçinin sözlərinə görə, İran administrasiyaya təklif edib ki, Hörmüz boğazı yenidən açılsın və genişmiqyaslı müharibənin dayandırılması ilə bağlı danışıqlar yeddi gün ərzində bərpa olunsun.

O bildirib ki, hazırkı təklif iyun ayında tərəflərin razılaşdırdığı anlaşma memorandumuna bənzəyir:

"Təklifə əsasən, danışıqların bərpası və Hörmüz boğazının açılması üçün ABŞ yeddi gün ərzində müəyyən şərtləri yerinə yetirməlidir".

İran xarici işlər naziri Vaşinqtonun cavabını gözlədiklərini deyib. Onun sözlərinə görə, Tehran tələsmir, lakin ABŞ-nin təklifi qəbul etməsinin və danışıqların noyabrın əvvəlində keçiriləcək aralıq seçkilərdən əvvəl bərpa olunmasının daha yaxşı olacağını düşünür.

ABŞ-nin adı açıqlanmayan rəsmisi isə jurnalistlərə bildirib ki, Vaşinqton üçüncü tərəflərin vasitəçiliyi ilə müsbət və konstruktiv danışıqlar aparır.