OMM Redaksiyası
Bakı Futbol Federasiyasının prezidenti Tahir Süleymanov FIFA U-15 dünya çempionatı və festivalı ilə bağlı müsahibəsində Azərbaycan futbolçularının potensialından danışıb. O, turnirin Hövsanda keçirilməsini böyük futbol bayramı adlandırıb və yarışda 200-dək ölkənin nümayəndələrinin iştirak etdiyini bildirib.
Süleymanov millidə çox yaxşı futbolçuların olduğunu, nəticələrin isə daha yaxşı ola biləcəyini deyib. Onun sözlərinə görə, bu, yeniyetmələrin ilk sınağıdır; onlar həm qələbələr qazanıb, həm də məğlub olublar. Əsas vəzifə futbolçuları qorumaq, istedadlarını inkişaf etdirmək və daha yüksək səviyyəyə çatdırmaqdır.
Yeniyetmə futbolçuların inkişafı
Federasiya rəhbəri dünya çempionatından sonra təhlillər aparılmasının vacibliyini vurğulayıb. O, ölkə üzrə, o cümlədən bölgələrdə, bütün yaş qruplarında uşaq-gənclər futbolunda dönüş yaratmağın zəruri olduğunu qeyd edib. Süleymanovun sözlərinə görə, turnirdə çıxış edən uşaqların böyük əksəriyyəti “Sabahın Ulduzları” layihəsindəki klubların futbolçuları olub.
O, formatın tələblərinə görə turnirdə 14 futbolçunun iştirak etdiyini, bununla belə, həmin və sonrakı yaş qruplarında dünya səviyyəsində oynamaq potensialı olan 50-100 futbolçunun olduğunu bildirib. U-14 Liqasının bombardiri Ceyms Eziaşi barədə danışan Süleymanov onun bu yaş qrupu üçün bir qədər kiçik olduğunu, Azərbaycan vətəndaşı və potensiallı futbolçu olduğunu deyib.
Süleymanov “Sabahın Ulduzları” layihəsinin gələn il davam edəcəyini və daha yüksək səviyyədə həyata keçirilməsinin nəzərdə tutulduğunu bildirib. Layihənin bütün Azərbaycana şamil olunması üçün strateji qərarın lazım olduğunu, yaxın vaxtlarda bu istiqamətdə addımlar atılacağına inandığını söyləyib.
