OMM Redaksiyası
Praqanın “Slaviya” klubu Çempionlar Liqasının əsas mərhələsinin ikinci turunda “Sabah”la qarşılaşmaq üçün Bakıya gəlib. Oktyabrın 13-də Bakı Olimpiya Stadionunda keçiriləcək matç Bakı vaxtı ilə saat 20:45-də başlayacaq.
Heyət problemləri
Çexiya təmsilçisinin heyətində zədəli futbolçular var. Müdafiəçi Ştepan Haloupek budun arxa əzələsində qismən yırtıq səbəbindən təxminən dörd-beş həftə meydana çıxa bilməyəcək. Yarımmüdafiəçi Pavel Kaçorun dönüş vaxtı isə məlum deyil. “Lans”la oyunda qırmızı vərəqə alan Mikulaş Konneçi də “Sabah”la matçı buraxacaq.
“Slaviya”nın slovakiyalı yarımmüdafiəçisi Daniel Şturm daha əvvəl Bakıda “Sabah”a qarşı oynayıb. O, 2025-ci il iyulun 10-da “Çelye”nin heyətində Azərbaycan klubuna 3:2 hesabı ilə qalib gəldikləri görüşdə məhsuldar ötürmə ilə yadda qalıb. Şturm “Lans”la ilk tur oyununda da “Slaviya”nın hər iki qolunu vurub; həmin matç 2:3 hesabı ilə bitib.
Uzun qələbəsiz seriya
“Slaviya” Çempionlar Liqasının əsas mərhələsində sonuncu qələbəsini 2007-ci ildə qazanıb. Praqa klubu həmin vaxtdan bəri bu mərhələdə keçirdiyi 20 oyunda qalib gəlməyib. Sport.cz nəşrinin məlumatına görə, bu, 2013-cü ildən turnirdə çıxış edən klublar arasında ən uzun qələbəsiz seriyadır.
Komandanın baş məşqçi köməkçisi Zdenek Qouştetski Bakıda üç xal qazanmağa çalışacaqlarını bildirib. Onun sözlərinə görə, məşqçilər və tibbi heyət mümkün qədər çox futbolçunu oyuna hazırlamaq üçün çalışır.
