OMM Redaksiyası
Şahidlərin sözlərinə görə, noyabrın 1-də, bazar günü səhər saatlarında Sudanın şimalındakı elektrik stansiyasına dron hücumu edilib. Zərbə yanğına və güclü partlayış səslərinə səbəb olub.
AnewZ-nin məlumatına görə, hücum paytaxt Xartumdan təxminən 538 kilometr şimalda, Nil çayı ştatında yerləşən Əbu Həməd elektrik stansiyasını hədəf alıb. Şahidlər stansiyanın ətrafında partlayış səsləri eşidildiyini və alovun obyektin bəzi hissələrini bürüdüyünü bildiriblər.
Bazar ertəsindən bəri Sudanın altı ştatında dron hücumları ilə hədəfə alınan elektrik stansiyalarının sayı 12-yə çatıb. Zərbələrin baş verdiyi ştatlar Xartum, Cəzirə, Sənnar, Qədarif, Nil çayı və Qırmızı dənizdir.
Sudan rəsmiləri hücum və mümkün itkilərlə, eləcə də dəymiş ziyanla bağlı dərhal açıqlama verməyib.
Son hücumdan əvvəl, şənbə günü Qırmızı dəniz ştatında tikintisi davam edən Hayya elektrik stansiyası da dron zərbəsinə məruz qalıb.
Hücumlar Sudandakı münaqişə fonunda baş verir
Elektrik infrastrukturu obyektlərinə hücumlar Sudan ordusu ilə Çevik Dəstək Qüvvələri (RSF) arasında davam edən münaqişə zamanı baş verir.
Tərəflər ölkənin hərbi qüvvələrinin birləşdirilməsi ilə bağlı fikir ayrılıqlarının silahlı münaqişəyə çevrilməsindən sonra, 2023-cü ilin aprelindən döyüşürlər.
