OMM Redaksiyası
Səudiyyə Ərəbistanı, Birləşmiş Ərəb Əmirlikləri, Qətər, Misir, İordaniya, İndoneziya, Pakistan və Türkiyənin xarici işlər nazirləri İsrailin məskənləri ilə əlaqəli ticarətə qarşı beynəlxalq tədbirlərin genişləndirilməsi üçün birgə təşəbbüs irəli sürüblər.
Birgə bəyanatda ölkələr Böyük Britaniyanın qanunsuz İsrail məskənlərindən malların idxalına qadağa qoymaq və həmin məskənlərlə əlaqəli xidmətlərə məhdudiyyət tətbiq etmək qərarını alqışlayıblar. Nazirlər digər hökumətləri də beynəlxalq hüquqa uyğun olaraq analoji addımlar atmağa çağırıblar.
Onlar Kanada, Danimarka, Finlandiya, Fransa, İslandiya, İrlandiya, Norveç, Polşa, Portuqaliya, İspaniya, İsveç və Böyük Britaniyanın açıqladığı təşəbbüsləri də dəstəkləyiblər. Həmin ölkələr məskənlərdə istehsal olunan mallara qarşı milli və ya Avropa səviyyəsində məhdudiyyətlər tətbiq etməyi planlaşdırır və ya bu addımı nəzərdən keçirirlər.
Diplomatlar qanunsuz İsrail məskənlərini dəstəkləyən və ya onların fəaliyyətini davam etdirən fəaliyyətlərə qarşı “konkret tədbirlər” görülməsinə çağırıblar. Onlar bu tədbirlərin beynəlxalq hüquqa, BMT-nin müvafiq qətnamələrinə və Beynəlxalq Ədalət Məhkəməsinin 19 iyul 2024-cü il tarixli məsləhət xarakterli rəyinə uyğun olduğunu bildiriblər.
Böyük Britaniyanın xarici işlər naziri Ed Milibend ölkəsinin qanunsuz İsrail məskənlərindən malların idxalına qadağa tətbiq edəcəyini açıqlayıb. Planlaşdırılan məhdudiyyətlər tikinti, infrastruktur, maliyyələşdirmə və daşınmaz əmlak da daxil olmaqla xidmətləri əhatə edəcək. Qanunsuz məskənlərin reklamına da qadağa qoyulması nəzərdə tutulur.
Milibend yeni qanunvericiliyin altı-doqquz ay ərzində qüvvəyə minəcəyini deyib. O vurğulayıb ki, sanksiyalar İsrailə deyil, qanunsuz məskənlərə və onların genişləndirilməsinə qarşı yönələcək.
İsrail bu tədbirlərə sərt etiraz edib. İsrailin xarici işlər naziri Gideon Saar Böyük Britaniyaya qarşı cavab addımlarının atılacağını, o cümlədən Şərqi Qüdsdəki Britaniya konsulluğunun bağlanmasının planlaşdırıldığını açıqlayıb.
Səkkiz ölkənin nazirləri, həmçinin iki dövlətli həllə çağırışlarını təkrarlayıblar. Onlar Qəzzanın gələcək Fələstin dövlətinin tərkib hissəsi olmalı olduğunu bildirərək, ABŞ Prezidenti Donald Trampın Qəzza münaqişəsinə son qoymaq üzrə hərtərəfli planının tam və dərhal icrasına çağırıblar.
Bəyanatda ədalətli, davamlı və hərtərəfli sülhə aparan “yeganə real yol”un 4 iyun 1967-ci il sərhədləri əsasında, paytaxtı Şərqi Qüds olan müstəqil, suveren, ərazi baxımından bütöv və həyat qabiliyyətli Fələstin dövlətinin yaradılması olduğu qeyd edilib.
