OMM Redaksiyası
Böyük Britaniya, Kanada, Fransa, Almaniya, İtaliya, Yaponiya və ABŞ-ın xarici işlər nazirləri Yəməndə fəaliyyət göstərən husilərin hücumlarını kəskin şəkildə pisləyiblər.
“Reuters”in məlumatına görə, nazirlər BMT Baş Assambleyasının kuluarlarında keçirilən görüşdən sonra yaydıqları birgə bəyanatda husilərin hücumlarının beynəlxalq ticarəti zəiflətmək və qlobal sabitliyi pozmaq riski daşıdığını bildiriblər.
G7-nin İrana çağırışı
G7 ölkələri İrandan husilərə silah və digər dəstəyi dayandırmağı tələb edib. Nazirlər bu siyasətin təhlükəli eskalasiya tendensiyası yaratdığını vurğulayıblar.
Bəyanatda husilərə bütün hərbi əməliyyatları, təhdidləri və mülki gəmilərə hücumları dərhal dayandırmaq, həmçinin siyasi prosesə vicdanla qayıtmaq çağırışı edilib.
Böyük Britaniyanın Səudiyyə Ərəbistanına dəstəyi
Böyük Britaniyanın Baş naziri Endi Börnham Səudiyyə Ərəbistanının müraciətindən sonra ölkəyə “müdafiə xarakterli hava-hava yanacaqdoldurma” dəstəyi göstəriləcəyini açıqlayıb.
“BBC”nin yazdığına görə, qərar müdafiə naziri Ues Stritinq və xarici işlər naziri Ed Milibendin tövsiyəsi əsasında qəbul edilib. Hökumət rəsmiləri dəstəyin müddətli olacağını və ilkin mərhələdə bir neçə həftə davam edəcəyini bildiriblər.
Bu açıqlamalar husilərin Səudiyyə Ərəbistanına, o cümlədən paytaxt Ər-Riyada hücumlarından sonra verilib. Hücumlar ölkənin neft marşrutları ilə bağlı təhlükəsizlik narahatlıqlarını artırıb.
