OMM Redaksiyası
“Sabah” basketbol klubunun ABŞ-li oyunçusu Cerri Bleyks Azərbaycan Basketbol Liqasında (ABL) mövsümün ilk oyununda “LANDAU Lions” üzərində qazanılan 84:74 hesablı qələbədən sonra fikirlərini bölüşüb.
Geridönüş üçün çox çalışdıqlarını deyən basketbolçu rəqibin də yaxşı komanda olduğunu bildirib: “Komanda olaraq əlimizdən gələni etdik. Rəqibin də haqqını vermək lazımdır, onlar yaxşı komandadır. Sadəcə, oyunu güclü başa vurmalı idik”.
Cerri Bleyks matçın çətin keçəcəyini əvvəlcədən bildiklərini vurğulayıb. O, bir neçə gün əvvəl də eyni rəqiblə qarşılaşdıqlarını və oyunboyu mübarizəni davam etdirməli olduqlarını qeyd edib.
Şəxsi çıxışını tam qənaətbəxş hesab etməyən legioner daha yaxşı oynaya biləcəyini söyləyib: “Əslində, razı qalmadım. Düşünürəm ki, daha yaxşı oynaya bilərəm. Özümü daha da inkişaf etdirə bilərəm. Amma qalib gəldik, bu da yaxşıdır”.
Bleyks azarkeş dəstəyindən də məmnun qaldığını bildirib. Onun sözlərinə görə, komanda mövsüm üçün qarşıya qoyduğu hədəflərə addım-addım çatmağa çalışacaq.
