OMM Redaksiyası
Azərbaycan Cüdo Federasiyasının (ACF) icraçı vitse-prezidenti Rəşad Rəsullu Bakıda keçiriləcək dünya çempionatına ev sahibliyi etməyin qürurverici olduğunu bildirib.
O, bu fikirləri yarışın püşkatma mərasimində çıxışı zamanı səsləndirib. Rəsullu dünyanın müxtəlif ölkələrindən gələn idmançıların qarşılıqlı hörmət və ədalətli mübarizə prinsipləri əsasında yarışacağını vurğulayıb.
ACF rəsmisi Beynəlxalq Cüdo Federasiyasının prezidenti Marius Vizerə, Azərbaycanın gənclər və idman naziri Fərid Qayıbova, eləcə də çempionatın hazırlıq və təşkilində iştirak edən şəxslərə təşəkkür edib.
Rəsullu püşkatmanı yarışların başlanmasına doğru son mərhələ adlandıraraq idmançılara möhkəm cansağlığı və uğurlu çıxışlar arzulayıb. O, iştirakçıların Azərbaycandakı vaxtlarından və ölkənin qonaqpərvərliyindən xoş təəssüratlarla ayrılacaqlarına ümid etdiyini bildirib.
Cüdo üzrə dünya çempionatı oktyabrın 4-11-də Milli Gimnastika Arenasında keçiriləcək.
