Misir ilə Qəzza zolağı arasındakı sərhəddə yerləşən "Rəfah" nəzarət-buraxılış məntəqəsi gələn həftədən etibarən hər iki istiqamətdə yenidən fəaliyyətə başlayacaq.
"Operativ Məlumat Mərkəzi-OMM" xəbər verir ki, bu barədə Qəzzanın İdarəetmə Komitəsinin rəhbəri, fələstinli siyasətçi Əli Şaat məlumat verib.
Davosda keçirilən Sülh Şurasının təsis mərasimi iştirakçılarına videomüraciət ünvanlayan siyasətçi, məntəqənin açılmasının bölgə üçün kritik əhəmiyyətini vurğulayıb:
"Məntəqə həm giriş, həm də çıxış istiqamətində açıq olacaq. "Rəfah" Qəzza sakinləri üçün xarici dünya ilə əlaqə yaradan yeganə həyati arteriyadır. Açılışın gələn həftə baş tutacağı dəqiqləşib".
Qeyd edək ki, sözügedən keçid məntəqəsi humanitar yardımların çatdırılması və sakinlərin hərəkəti baxımından bölgədəki ən mühüm strateji nöqtə hesab olunur.
