OMM Redaksiyası
Qara dənizdə heyətində Azərbaycan vətəndaşlarının da olduğu xarici yük gəmisinə dron hücumu edilib. Hadisə nəticəsində iki azərbaycanlı dənizçi həlak olub.
Azərbaycan Xarici İşlər Nazirliyinin məlumatına görə, ölənlər Aslan Əliyev və Asim Qasımovdur. Hücum zamanı daha iki Azərbaycan vətəndaşı — İmran Novruzov və Rauf Əliyev yaralanıb.
Yaralılar Ukraynanın cənub-qərbində yerləşən Çornomorsk şəhərində xəstəxanada müalicə olunurlar. Onların müayinə və müalicədən sonra Azərbaycana qayıtmaları gözlənilir.
Hadisəyə münasibət bildirən Xarici İşlər Nazirliyi həlak olanların ailələrinə və yaxınlarına başsağlığı verib, yaralılara şəfa arzulayıb.
“Bir daha Azərbaycan vətəndaşlarını hərbi əməliyyatların davam etdiyi və ya təhlükəsizlik vəziyyətinin qeyri-sabit olduğu bölgələrə səfər etməkdən, həmin ərazilərdə əmək fəaliyyəti ilə məşğul olmaqdan, eləcə də bu marşrutlarda hərəkət edən nəqliyyat vasitələrində, o cümlədən gəmilərdə işləməkdən çəkinməyə çağırırıq”, — nazirliyin açıqlamasında bildirilib.
Məlumata görə, “TEDY” adlı Somali bayrağı altında üzən yedək gəmisinin heyətində dörd Azərbaycan vətəndaşı olub. Gəmi əvvəlcə Ukraynanın cənub-qərbində, Odessa yaxınlığında dronların hücumuna məruz qalıb.
Zədələnmiş gəmi Rumıniyanın Konstansa limanına doğru hərəkət edərkən daha iki dron hücumuna məruz qalıb. Sonuncu hücum zamanı Aslan Əliyev və Asim Qasımov həlak olub.
Azərbaycan Xarici İşlər Nazirliyi hücumun kim tərəfindən həyata keçirildiyini açıqlamayıb. Nazirlik məsələ ilə bağlı “müvafiq ölkələrin” qurumları ilə əlaqələndirilmiş şəkildə işlədiyini bildirib.
Bu il iyun ayında da Azov dənizinin Taqanroq körfəzində “Natra” və “Zircon” yük gəmilərinə dron hücumu nəticəsində beş Azərbaycan vətəndaşı həlak olmuş, üç nəfər yaralanmışdı.
