Afət Ziyadqızı
Ermənistan Kollektiv Təhlükəsizlik Müqaviləsi Təşkilatında (KTMT) iştirak etməkdə artıq maraqlı deyil.
“Operativ Məlumat Mərkəzi-OMM” "Sputnik Armenia"ya istinadən xəbər verir ki, bu barədə Baş nazir Nikol Paşinyan hökumətin iclasından sonra keçirdiyi brifinqdə bildirib. Paşinyan ölkəsinin KTMT ilə bağlı maraqlarının tamamilə tükəndiyini vurğulayıb.
Öz növbəsində xarici işlər naziri Ararat Mirzoyan parlamentdəki brifinqdə İrəvanın təşkilatda tamhüquqlu iştirakın bərpası üçün heç bir perspektiv görmədiyini qeyd edib. Nazir Ermənistanın KTMT-dəki iştirakını çoxdan dondurduğunu xatırladıb.
Xatırladaq ki, KTMT-nin baş katibi Talaatbek Masadıkov noyabrın 11-də keçiriləcək sammitdə təşkilatın nizamnaməsinin 25-ci maddəsinin Ermənistana tətbiqi məsələsinə baxıla biləcəyini açıqlayıb. Həmin maddə iki ildən artıq müddətdə üzvlük haqlarını ödəməyən dövlətlərin səsvermə və namizəd irəli sürmək hüquqlarının məhdudlaşdırılmasını nəzərdə tutur. Ermənistan 2024-cü ildən təşkilatda iştirakını dondurduğunu elan edərək üzvlük haqlarının ödənişini dayandırıb.
