Pakistanın qərbindəki Harnay şəhərində yaraqlıların qaz kəmərini partlatması nəticəsində Kvetta və Yuxarı Bəlucistana qaz təchizatı qismən dayandırılıb.
“Operativ Məlumat Mərkəzi-OMM” xəbər verir ki, bu barədə Pakistanın "The Express Tribune" qəzetinin məlumatında deyilir.
Partlayış nəticəsində yerli enerji şirkəti "Sui Southern Gas Company"yə (SSGC) məxsus qaz kəmərinin borusu zədələnib.
Şirkətin nümayəndəsi qəzanı təsdiqləyərək bildirib ki, hadisə yerinə gələn mütəxəssislər qaz təchizatını dayandırıb və yanğını söndürüblər. Lakin qaz kəməri tamamilə sıradan çıxıb.
SSGC-nin nümayəndəsi bəyan edib ki, boru kəmərinin zədələnmiş hissəsinin təmirinə hüquq-mühafizə orqanlarından icazə alındıqdan sonra başlanılacaq.
Təmir işlərinin 12-24 saat davam edəcəyi və bundan sonra qaz təchizatının bərpa olunacağı gözlənilir.
