Yanvarın 26-da Aİ Şurası Rusiya qazının Aİ ölkələrinə idxalının mərhələli şəkildə dayandırılması qaydaları barədə razılığa gəlib.
"Operativ Məlumat Mərkəzi-OMM" xəbər verir ki, bununla bağlı Aİ Şurasının mətbuat xidməti məlumat yayıb.
Bildirilib ki, bu gün 27 Aİ üzv dövləti Rusiya boru kəməri qazının və mayeləşdirilmiş təbii qazın Aİ-yə idxalını qadağan edən qaydaları rəsmi olaraq təsdiqləyib.
Qeyd olunub ki, mayeləşdirilmiş təbii qazın idxalına tam qadağa 2027-ci ilin əvvəlində, boru kəməri qazının isə 2027-ci ilin payızında qüvvəyə minəcək.
Yeni qaydalar Avropa İttifaqının enerji təchizatının effektiv şəkildə monitorinqinə və şaxələndirilməsinə yönəlmiş tədbirləri əhatə edəcək.
Avropa İttifaqına qaz idxalına icazə verməzdən əvvəl Aİ ölkələri qazın hansı ölkədə istehsal olunduğunu yoxlamalıdırlar.
Yeni qaydalara əməl edilməməsi fiziki şəxslər üçün ən azı 2,5 milyon avro, şirkətlər üçün isə ən azı 40 milyon avro və ya şirkətin ümumi illik dünya dövriyyəsinin ən azı 3,5%-i və ya təxmin edilən əməliyyat dövriyyəsinin 300%-i miqdarında cərimə ilə nəticələnə bilər.
Bundan əlavə, Aİ-nin hesabatına görə, Avropa Komissiyası 2027-ci ilin sonuna qədər Rusiya neft idxalını tədricən dayandırmaq üçün qanunvericilik təklif etməyi planlaşdırır.
