"Nyukasl" klubu yay transfer pəncərəsində hücum xəttini gücləndirmək niyyətindədir.
"Operativ Məlumat Mərkəzi-OMM" "talkSPORT" nəşrinə istinadən xəbər verir ki, komandanın əsas hədəfi icarə əsasında çıxış etdiyi "Bavariya"dan "Çelsi"yə qayıdacaq Nikolas Ceksondur.
Almaniya təmsilçisinin idman direktoru Maks Eberl klubun mövqeyini təsdiqləyərək, Ceksonun müqaviləsindəki satın alma hüququndan istifadə etməyəcəklərini bildirib.
Cari mövsümdə Eddi Haunun rəhbərlik etdiyi "Nyukasl" hücumların tamamlanmasında ciddi çətinliklərlə üzləşib.
Yayda komandaya cəlb olunan Nik Voltemade və Yoan Vissa sabit oyun nümayiş etdirə bilməyib və İngiltərə Premyer Liqasında cəmi səkkiz qol vurublar.
Seneqallı futbolçunun "Çelsi"dəki göstəriciləri (81 matçda 30 qol və 12 məhsuldar ötürmə) onun yüksək səviyyədə fayda verə biləcəyini sübut edir. Hücumçunun sürəti və birbaşa oyun tərzi Haunun keçidli taktiki sisteminə tam uyğun gəlir.
Digər tərəfdən, Joao Pedro və Liam Delapın gəlişi ilə "Çelsi"nin hücum xəttində rəqabət daha da artıb. Bu vəziyyət Ceksonun "Stemford Bric"dəki gələcəyini sual altında qoyur və onun transferini daha real edir.
