OMM Redaksiyası
"Nyukasl" klubu hücumçusu Entoni Qordonun "Bavariya"ya transferi ilə bağlı danışıqlara başlamağa hazırdır.
"Operativ Məlumat Mərkəzi-OMM" xarici KİV-ə istinadən xəbər verir ki, İngiltərə Premyer Liqasında ardıcıl üç məğlubiyyətdən sonra komanda 14-cü pilləyə geriləyib.
Çempionlar Liqasından kənarda qalmaq təhlükəsi klubu aparıcı oyunçularını satmağa məcbur edə bilər.
"The Times" nəşrinin məlumatına görə, yay transfer pəncərəsi ərəfəsində "Nyukasl" Qordon üçün 75 milyon funt-sterlinq qiymət müəyyənləşdirib.
Klub bu məbləği ödəməyə hazır olan "Bavariya" ilə danışıqlar masasına əyləşməyə razıdır.
İki klub arasında hələlik rəsmi əlaqə yoxdur. 25 yaşlı ingilis futbolçu komandanı tərk etməyə müsbət yanaşır. Onun "Arsenal" kimi digər Premyer Liqa klublarından da təkliflər ala biləcəyi istisna edilmir.
Qeyd edək ki, Entoni Qordon bu mövsüm baş məşqçi Eddi Haunun rəhbərliyi altında bütün turnirlərdə 20 məhsuldar hərəkətlə yadda qalıb.
