OMM Redaksiyası
Seneqalın paytaxtı Dakarda keçirilən Yeniyetmələrin IV Yay Olimpiya Oyunlarında çimərlik güləşi üzrə gümüş medal qazanan Nihad Süleymanlı final görüşündəki məğlubiyyətindən danışıb. O, bir anlıq səhvin qızıl medal qazanmaq imkanına təsir etdiyini bildirib.
“Şükürlər olsun ki, gümüş medal qazandım. Bu nəticə qızıl medal da ola bilərdi, lakin təəssüf ki, bir anlıq səhv səbəbindən ikinci yeri tutdum. Lakin bu son deyil. Qarşıda bizi daha mötəbər yarışlar gözləyir və inşallah, bu gümüşü qızıla çevirmək üçün əlimdən gələni edəcəyəm”, – Süleymanlı deyib.
Azərbaycan təmsilçisi finaldakı rəqibi ilə əvvəlki qarşılaşmasını da xatırladıb. Onun sözlərinə görə, Bakıda keçirilən dünya çempionatında çempion olduğu zaman rəqibi ilk üçlükdə yer ala bilməyib.
“Bu dəfə isə bir anlıq səhv və rəqibin günündə olması nəticəyə təsir etdi. Hər bir yarışdan dərs çıxarmaq lazımdır. İnşallah, növbəti turnirlərdə hər şey daha da yaxşı olacaq”, – güləşçi vurğulayıb.
Süleymanlı qarşıdakı beynəlxalq yarışlarda Azərbaycanı daha yüksək səviyyədə təmsil etmək üçün hazırlıqlarını davam etdirəcəyini də qeyd edib.
